كيف اكسر الملل؟

Admin المساهمات : 5 تاريخ التسجيل : 17/03/2012

الملل هو العدو الاول للانسان الواحد عاوز يكسرة وخاصة لما يكون الملل جاي من روتين الحياة اليومي اللي ما بيتغيرش ابدا ..... تصحي كل يوم الصبح ...... تدخل الحمام .... تغسل وشك ..... تلبس هدومك .... تطلع من البيت .... في ايام الدراسة تطلع وانت ماعندكش مشكله .. تهيص تزيط ... براحتك لكن ... واه من لكن .. ايام الاجازة .. مش بتاعتك .. دي بتاعة العيال والمدام ... علشان ترتاح من ترتيبات المدارس ... المهم وانت طالع من البيت تتسحب زي الحرامي من غير صوت .. وياويلك لو طلع اي صوت من الباب او المفاتيح ... او العربية .... تلاقي حاجات بتتحدف مانتاش عارف جاية منين ... لان احيانا العيال بيشاركو في العملية ... والمطلوب منك انك .. تتطلع وانت صامت تماما. ههههه
تركب العربية وتروح الشغل من نفس الطريق ما بيتغيرش وتسمع نفس محطة الاذاعة .. ليه .. اهو كسل مش قادر اغير المحطة ..وتروح الشغل .. جوود موورنينج .. جوود مورنينج سير.
هاو ار يو توداي ؟ ... آآم فاين .. وات اباوت يو؟ ... مافيش اجابة كل يوم...
وتبدا يومك اللي هو زي امبارح .. واعتقد زي بكرة...
ويخلص اليوم وتبدا مرحلة العودة للبيت ...
- آآآآلووو .. عاوزين حاجة؟
- هات معاك عيش وحليب وطماطم وبابمرز علشلن البت ( ال يعني انا اللي بالبسه)... وعدي علي السوبرماركت وماتنساش عيش كايزر علشان المدرسة والسندوتشات... وهات معاك عصير ... و,... و...
- حااضر ... ايوه ... حاضر ... انا باسجل اهو اللي انت عاوزاه ...
خلاص كدة واللا فيه حاجة تانية ؟
- ابقي اتصل ولو افتكرنا حاجة هانتصل .
وتبدا رحلة الجمعية والسوبر ماركت والذي منه ...
وكل يوم علي هذه الحالة ... التغيير الوحيد هو نوعية الطلبات ممكن تتغير شوية .. تزيد .. تخس .. لكنها عمرها ما تتلغي ...
وترجع البيت .... تا تا تا .
تلاقي العيال منتظرين بقائمة تانية .. اصل يابابا الميس طلبت ده النهاردة وعاوزاه بكرة .. وكمان تجيبه من المكان الفلاني ... طب مانا كنت هناك من شويتين ماقلتيش ليه.
- اصل انا يابابا ماكنتش اعرف انك جاي دلوقتي ...- ياجبانه امال هاجي امته؟
هيه الساعة كام يابابا ؟
وتقعد تسال الكابتن الصغير ..
- ايه يازعيم اخبار المدرسة والواجبات ؟
- انا ماعنديس الا واجب واحد اتنين تلاته بث.
- ممتاز هات الشنطة واقعد لاعبني ... اقصد اقعد قدامي علشان نعمل المطلوب؟
- هيه الساعة كام يابابا؟
- ليه؟
- اصل فيه فيلم هاييجي الساعة سبعة عل ام بي سي تري .
- ممتاز جدا .. وخلصتي واجبك يابابا ؟
انا ماعنديش اي واجبات النهاردة. ...
ازاي يعني ؟
الميس مادتناش واجبات.
وتفاجأ تاني يوم مكتوب لها في الكراسة " مهملة لانها لم تعمل واجبها امس"
دي حاجة تجنن .
اه علي الملل .. هو فين بس
منقول للفائدة